Bashkim Fino një nga veteranët e Partisë Socialiste, në ditët e fundit ka filluar të tregojë shenja se nuk është “rilindas”. Fino ka mbajtur disa poste të rëndësishme qeveritare, por në 6 vite të PS-së së Ramës në pushtet ka mbetur disi në periferi dhe është mjaftuar vetëm me poste parlamentare.
Por në ditët e fundit Bashkim Fino ka filluar të përplaset me disa prej figurave më të spikatura të “Rilindjes”. Në fillim ishte Manja, kryetar i Komisionit të Ligjeve që e pësoi i pari nevrikosjen e “Baçit”.
Shkak u bë një raportim i rëndomtë i Avokatit të shtetit dhe nuk u pa me ndonjë sy shumë dyshues. Por përplasja sot, po në Komisionin e Ligjeve me Vasilika Hysin, i ngre disa pikëpyetje. Hysi, apo siç brenda në PS njihet, “zysha” është një nga njerëzit më me pushtet dhe që fjala i ka peshë, sidomos në fushën e ligjeve, duke qenë një nga njerëzit që Rama e ka mbajtur shumë pranë. Por as kjo gjë nuk ka bërë që Fino të stepet dhe ta kundërshtojë hapur madje edhe në prani të medieve.
Mbase është vetëm një rastësi të dyja këto përplasje, por nuk duhen përjashtuar edhe gjasat se brenda në PS mund të ketë një çarje mes gardës së vjetër dhe “rilindësve”.
