Edlira Çopa, nëna shqiptare e cila në mars të vitit 2014 vrau me thikë të tre vajzat e saj ka fituar lirinë edhe pse të pjesshme.
Mediat italiane shkruajnë se ajo përfundoi programin e saj të reahbilitimit në ish-spitalin psikiatrik në Castiglione delle Stiviere dhe më 1 qershor është kthyer në gjysmë-liri e strehuar në një strukturë të mbrojtur në krahinën e Leccos.
Ngjarja e rëndë ndodhi në mars të vitit 2014 ku Edlira vrau me thikë tre vajzat e saj Simonën 13 vjeçe, Keisi, 10 vjeçe dhe Sidny vetëm 3 vjeçe në banesën e tyre në Bergamo, duke tentuar më pas të vriste edhe veten. Ajo u përpoq të hidhej nga shkallët por u ndalua nga karabinierët.
Nëna me origjinë shqiptare, e cila tani është dyzet e dy vjeç, u diagnostifikua nga ekspertiza si krejtësisht e paaftë për të kuptuar dhe për të dëshiruar, dhe si e tillë, as e dënueshme për vrasjen e trefishtë.
“Vajzat e mia të vogla nuk janë më”. “Ku janë Edla, janë nisur? Janë në Shqipëri?”. “Jo, i kam vrarë”. Këto kishin qenë fjalët e para të thëna nga Edlira, rrëfimi i parë i asaj çmendurie horror tek një fqinjë tek e cila kishte shkuar në mëngjes herët dhe i kishte rënë ziles së shtëpisë.
“Ishte një maskë gjaku, si në një film horror”, kishte thënë atëherë Nadia Valsecchi, ende e tronditur. “Më duket se kishte një këmishë me një njollë të madhe gjaku para. Duart ishin të përgjakura”.
Gjatë marrjes në pyetje për herë të parë, në Repartin e Reanimacionit të Spitalit të Leccos, Edlira kishte thënë se “në Itali ka mafiozë. E bëra për të parandaluar që vajzat e mia të përfundonin keq”.
Edlira ishte ndarë nga bashkëshorti i saj, Bashkim Dobrushi dhe për këtë arsye kishte frikë se vajzat e saj mund të vuanin për shkak të vështirësive ekonomike.
“Një arsyetim absurd me logjikën e saj, i çmendur po, por me pasoja – kishte thënë Prokurori Ëalter Mapelli. Nga ana tjetër, mizoria e incidentit dhe të njëjtat motivime të pa kuptimta janë shenjë e një problemi serioz mendor për gruan, por këtë duhet të na e thonë ekspertët”.
