Veliaj bën premtimin e bujshëm, mandatin tjetër ndërtohet kampusi universitar më modern në Ballkan

Kryebashkiaku Erion Veliaj në garë këto zgjedhje të 30 qershorit për një mandat të dytë në krye të Tiranës ka vijuar edhe sot me një takim elektoral në zonën e Kombinatit. Duke folur para mbështetësve të tij, mes të tjerash, Veliaj ka bërë edhe një tjetër premtim të bujshëm.

Veliaj premtoi që brenda mandatit të ardhshëm do të ndërtohet kampusi i ri universitar i Tiranës. Sipas tij ku projekt do e bëjë Tiranën si qyteti më kampusin universitar më modern në Ballkan.

“Ajo që është lajm i mirë është se më në fund do të kemi një kampus model universitar. Dhe për të gjithë studentët që i kanë kaluar vitet në kushte spartane, ku fakultetin e kishte një universitet, konviktin e kishte një ndërmarrje, më në fund në një dorë të vetme në lidershipin e Bashkisë së Tiranës dhe me ndihmën financiare të kryeministrit Edi Rama do t’i japim Tiranës kampusin e ri më modern që ka Ballkani për studentët. Ne do merremi me infrastrukturën, po studentët duhet të merren patjetër me 10-at.  Nuk mund të jemi më rinia që ha fara dhe rri në kafe gjithë ditën, nëse kushtet i kemi atëherë duhet të bëjmë maksimumin që gjenerata e re e shqiptareve jo vetëm të ketë notat më të mira por edhe aftësitë për të na çuar aty ku meriton ky vend, një hapësirë dinjitoze evropiane”, theksoi kryebashkiaku Veliaj