Ened Bostani është 29-vjeçari i cili u plagos ditën e djeshme gjatë protestës së opozitës.
Fillimisht pas fotove të plagëve që qarkulluan në internet, Partia Demokratike pretendoi se protestuesi Ened Bostani kishte marrë një plagë plumbi.
Më pas incidenti u sqarua nga Ministria e Shëndetësisë që në një komunikatë për mediat thuhej se protestuesi ishte plagosur nga mjetet piroteknike.
Ndërkohë Ened Bostani vazhdon të jetë i shtruar në spitalin e Traumës ku ka folur dhe për mediat duke treguar sesi u plagos dhe duke akuzuar mjekët e spitalit që sipas tij kanë fshehur pjesët metalike.
“Isha duke filmuar protestuesit me telefon tek hyrja e Parlamentit me kurriz nga policia. Aty rashë në tokë, nuk pash gjë. Shkova në spital ku më dhanë ndihmën e shpejtë. Në këmbë kam marrë pjesë metalike që mi fshehën në spital.”
Bostani, i cili është kthyer nga emigrimi tre vite më parë tregon se nuk do të heqë dorë nga protesta.
“Do të marr pjesë prapë në protestë edhe sikur me paterica të shkoj. Kam qenë emigrant dhe jam kthyer por tashmë jam emigrant në shtetin tim”, thotë ai.
