“Shqipëria po rrëshqet në diktaturë”, ish-deputetja e PD kërkon gratë në protestën e Opozitës

Albana Vokshi kur duhen edhe pak ora nga fillimi i protestës së Opozitës në bulevardin “Dëshmorët e Kombit” ka bërë një thirrje për pjesëmarrje.

Përmes një postimi në rrjetet sociale, Vokshi i ka bërë një apel më të veçantë për të marrë pjesë në këtë protestë grave dhe vajzave shqiptare.

Sipas saj do të protestohet kundër Ramës, por vendi është në rrezik serioz të kalimit në një sistem diktatorial.

“Shqipëria proteston kundër Kryehajdutit Edi Rama! Sot, gratë dhe vajzat e Shqipërisë bashkohen për Shqipërinë si Evropa! Sot, të gjitha gratë e vajzat do të dalin në protestë, me fëmijët dhe për fëmijët tanë!

Të dashura nëna dhe motra! Shqipëria po rrëshqet në diktaturë. Ne duhet ta ndalim Edi Ramen që po burgos politikisht gra, vajza e fëmijë!

Sot, të gjitha bashkë, përkrah njëra-tjetrës, do te jemi në marshimin e çlirimit të institucioneve nga krimi i organizuar, në ora 20:00 në bulevardin “Dëshmorët e Kombit”. Të jemi bashkë me familjet tona për #Shqipërinë si Europa”, shkruan Vokshi.