Deputetja Rudina Hajdari e ka dënuar mbrëmë aktin e djegies së shkollës në Shkodër me qëllim asgjesimin e materialeve zgjedhore që ndodheshin aty brenda.
Hajdari ka folur me tone të ashpra për këtë gjest duke e cilësuar si një traumë kombëtare dhe shton se pagën e saj mujore do ta dhurojë për riparimin e dritareve të shkollës që u përfshi nga flakët.
REAGIMI I PLOTE I RUDINA HAJDARIT
“Të dashur demokratë,
Djegia e shkollave në Shkodrën e kulturës dhe traditave ishte një traumë kombëtare dhe dhunë anti-shqiptare.
Për këto arsye vendosa sot që pagën (rrogën) mujore t’a dhuroj për riparimin e dritareve të shkollës që u dogj dje në këtë qytet nga ata që nuk janë as demokrat dhe as socialist por thjesht servil të kryetarit dhe shpresojnë që në të ardhmen të shpërblehen me parimin: “Kush djeg dhe shkatrron më shumë bëhet drejtor ose doganier”
Le të jetë paga ime fillimi një fushate ndërgjegjesimi nga çdo shqiptar që kërkon një Shqipëri si Europa.
Me respekt,
Rudina A. Hajdari”
