Kryeministri Rama këtë pasdite ishte në një takim elektoral në bashkinë e Vaut të Dejës, ku ka prezantuar kandidatin socialist për të drejtuar këtë bashki.
Nga takimi në Vaun e Dejës, Rama ka treguar edhe disa prapaskena të kërkesave të tij për dialog kushtuar liderit të Opozitës, Lulzim Basha. Sipas Ramës, ai është lutur aq shumë për negociata sa që edhe Romeo do e kishte zili.
“Kanë qenë që në sekondën e parë kundër reformës në drejtësi. Këta bëjnë sikur janë flamurtarë të antikrimit, por këta nuk duan reformën në drejtësi, e cila do pastrojë vendin nga çdo lloj politikani që ka shkatërruar vendin. Ata vetëm bëjnë llafe e llafe. Këta nuk duan që të votohet vettingu. Kanë 300 vjet me këtë parullë ‘Rama ik’, ‘Basha ik’ etj lënë parullën nuk ndryshojnë vetëm emrin se kaq dinë. Iu luta Bashës aq sa nuk do i isha lutur grave të planetit, femrave më të bukura, aq sa edhe Romeo do habitej. Në fund fare u bind dhe mori gjysmën e qeverisë. Mori edhe drejtorinë e burgjeve, sepse e duan shumë. Këta kur ishin në pushtet, nxirrnin kriminelët nga burgu me leje lindjeje. I çonin nëpër fushata për të terrorizuar njerëzit. Kemi çfarë kemi me njëri-tjetrin, mos shajmë në gjuhë të huaj. Por nuk ka më, të pranojnë realitetin dhe forca fituese duhet të qeverisë. Këtë gjë duhet ta mësojnë njëherë e mirë”, deklaroi Rama.
