Rama e nis fushatën nga Durrësi duke kujtuar Sokol Olldashin

Kryeministri Edi Rama është në qytetin e Durrësit këtë pasdite, ku ka prezantuar kandidaten socialiste për drejtimin  e kësaj bashkie, Valbona Sako.

Duke folur nga qendra e Durrësit, Rama fillimisht ka folur me superlativa për kryetarin në detyrë të Durrësit, Vangjush Dako.

Kryeministri Rama tha se Dako e nisi me një fitore me pak vota, por më pas ia doli që edhe të mposhtë një njeri shumë të fortë në fushatë, si Sokol Olldashi.

Rama teksa foli për ish-ministrin e ndjerë demokrat, nuk i kurseu lëvdatat, duke thënë për të se ka qenë një orator shumë i mirë dhe figurë e spikatur.

“Vangjush Dako e nisi rrugëtimin për të drejtuar bashkinë e Durrësit duke fituar me një grusht votash dhe më pas falë provave të prekshme që u dha qytetarëve duke fituar në mënyrë bindëse dhe më pas duke fituar në mënyrë triumfuese. Ajo që sot duhet thënë shumë qartë që ta dëgjojnë të gjithë është se kush përpiqet sepse normalisht nuk ka asnjë rrugë tjetër se të shtojë baltën mbi Vangjushin dhe bashkinë nuk do që qytetarët që të kujtojnë dicka. Në Durrës Dako ka fituar kur në pushtet ishte Saliu me të gjithë skuadrën më të mirë që ka pasur PD-ja në historinë e saj dhe mekanizmat e saj që ju e dini si përdoreshin në kohën e tij.

Njeriu dhe partia që mundën Saliun me Sokol Olldashin që ka qenë përfaqësuesi politik këtu, me Topallin dhe të tjerë kur ishin në pushtet, u dashka të blejë vota për të mundur Lulin me Gridën dhe Salianjin. Të kesh mundur Sokol Olldashin një nga figurat më të spikatura, orator dhe njeri i njohur për forcën e larmishme në fushatat elektorale dhe të akuzohesh se ke blerë vota për të mundur Bylykbashin. Durrësi do ta kujtojë me respekt dhe admirim periudhën kur Dako drejtoi bashkinë, falë gjurmëve që janë kudo në këtë qytet” tha Rama.