LIGJET E BIZNESIT
Startojnë sot provimet e Maturës Shtetërore 2019. Që herët në mëngjes, maturantët i janë nënshtruar provimit të parë, atij të gjuhës angleze. Ky proces po zhvillohet në 206 shkolla në të gjithë vendin. Policia ka marrë masat për të garantuar mbarëvajtjen. Sipas njoftimit për shtyp, në shërbim për të garantuar procesin janë inkuadruar 560 efektivë dhe 45 automjete.
“Në zbatim të urdhrit të Drejtorit të Përgjithshëm të Policisë së Shtetit. “Për planifikimin dhe kryerjen e shërbimeve policore gjatë procesit të provimeve të Maturës Shtetërore 2019”, nga strukturat e rendit publik/policimit në komunitet në të gjitha drejtoritë vendore të policisë/komisariatet/stacionet e policisë, si dhe repartet e FNSH-të, të cilat kanë marrë në ruajtje disa objekte, janë marrë masat për garantimin e rendit dhe sigurisë si dhe të mbarëvajtjes së procesit përsa i përket detyrimeve që ka Policia e Shtetit”, theksohet në njoftimin për shtyp.
Policia shpjegon se shërbimet e saj në të gjitha strukturat vendore, në zbatim të planeve të masave të përgatitura për këtë qëllim, kanë marrë të gjitha masat e nevojshme për të monitoruar nga jashtë me shërbime policore gjithë procesin e provimit në të gjitha shkollat ku do të zhvillohet provimi. Pas përfundimit të provimit përsëri, punonjësit e Policisë do të kryejnë shoqërimin e materialeve të provimit në destinacionin përkatës.
