Përplasja në KZAZ-në e Dibrës, Lleshaj: Verbëria e dhunës politike

Protesta pranë KZAZ numër 19 në Dibër po shoqërohet me tensione të ashpra.

Protestuesit janë përplasur ashpër me policinë, duke bërë që këta të fundit të përdorin gaz lotsjellës për të shpërndarë njerëzit.

Policia ka hedhur me shumicë gaz lotsjellës ndaj protestuesve, të cilët tentojnë me çdo kusht të çajnë kordonin e policisë dhe të futen brenda ambienteve të KZAZ për ta liruar nga materialet zgjedhore.

Sakaq ka ardhur edhe reagimi i ministrit Sandër Lleshaj në lidhje me këtë çështje. Ministri i Brendshëm garanton një reagim të fortë për të gjithë ata që po shkelin ligjin.

Ministri Lleshaj në tuiter:

Verbëria e dhunës politike po sulmon sot me molotov KZAZ e vendosur në shkollën “Nazmi Rushiti” dhe Policinë në Dibër, nën drejtimin e përfaqësuesve të lartë të opozitës. Ligji do të veprojë pa asnjë mëdyshje ndaj çdo forme të krimit!