Përgjimet e “Bild”, reagon për herë të parë Vangjush Dako

Kryetari i Bashkisë së Durrësit Vangjush Dako ka reaguar për herë të parë pas publikimit të audiopërgjimeve nga gazeta gjermane “Bild”.

I pyetur nga RTV Ora, Dako është shprehur: “I pashë dhe i dëgjovë përgjimet. Për mua janë diçka absurde, sepse unë jam kryetar bashkie dhe telefonin do t’ua hap çdo qytetari. Nuk kam asnjë koment. Kjo është çështje mediatike”, ka thënë ai.

Në video dëgjohet se është Astrit Avdylaj ai që e telefonon Dakon dhe e pyet për Takimin me Ramën. Sipas Bild, Astrit Avdylaj në momentin që flet me Dakon ndodhet në zyrën e regjistrimit të pronave, në praninë e drejtorit të zyrës dhe Vath Allës, një ish-i dënuar për vrasje për të ‘mbaruar’ një punë për llogari të Allës.

Avdylaj i thotë Dakos që të anulojë planet e tij për të udhëtuar në Ishëm, për të siguruar që ‘puna’ që Alla po kërkon, të përfundohet tek zyra e hipotekës nga drejtori që telefonon Anin dhe më pas Dakon për t’u takuar me të dhe më të dënuarin për vrasje, Vath Alla. Kryebashkiaku Dako pranon dhe ndryshon agjendën.

Ndonëse përmendet kryeministri Rama, ky përgjim implikon kryebashkiakun pasi tregon afrinë që ka Dako me Avdylajn, i cili i referohet si vëlla. ‘Hajde të du fort vëllai’, i thotë kreu i grupi të Shijakut, Dakos në fund të bisedës.