LIGJET E BIZNESIT
10 përgjimet e publikuara nga gazeta gjermane BILD këtë të mërkurë kanë shkaktuar një stuhi të vërtetë në politikën shqiptare. Saimir Tahiri, Damian Gjiknuri, Xhemal Qefalia, Ulsi Manja, Pjerin Nderu… janë vetëm disa nga zyrtarët më të lartë të Partisë Socialiste që përmenden ne audio- përgjimet e BILD. Nëse në dy herët e para ka pasur vend për aludim, në këto përgjime të kësaj radhe të publikuara nga BILD nuk ka vend për asnjë interpretim, se në Dibër janë blerë votat masivisht.
Përgjimet bëjnë fjalë për zgjedhjet e pjesshme lokale për Bashkinë e Dibrës në vitin 2016 dhe disa nga personazhet e tyre kanë punuar në favor të PS-së. Nga Opozita, me në krye Lulzim Bashën me nxitim kanë vërshuar akuzat në drejtim të Mazhorancës për ta akuzuar për atë që mund të quhet pa frikë në masakër elektorale.
Por te PD ndoshta kanë harruar një detaj shumë të rëndësishëm.
Në gjirin e Opozitës prej gati dy vitesh është Partia për Drejtësi Integrim dhe Unitet (PDIU), e cila në zgjedhjet e fundit parlamentare kanë dalë forcë e tretë në këtë qark. Partia e Shpëtim Idrizit, e cila që në themelin e saj ka mbrojtjen e çështjes çame mori një mandat dhe rreth 16% të votave në këtë qark, duke rrezikuar të marrë edhe mandatin e dytë. Deri më tani nuk ka dalë asnjë përgjim nga BILD për atë çka mund të ketë ndodhur në zgjedhjet e 2017-ës.
Por duke pasur parasysh që janë pak a shumë të njëjtën personazhe që një vit më vonë mbledhin vota nën siglën e PDIU, vetëm mund të hamendësohet masakra elektorale që ka ndodhur në Dibër me qëllimin për ta nxjerrë këtë parti me një deputet nga ky qark.
Deri më tani nga PD dhe të gjitha forcat opozitare puna e gazetës gjermane BILD është përgëzuar dhe e kanë cilësuar si çjerrje të maskës së Partisë Socialiste. Por mbetet për tu parë se cili do të jetë reagimi i Lulzim Bashës nëse në përgjime të ngjashme do të dalë edhe emri i aleatit të tij të ngushtë, Shpëtim Idrizi. /Fast News Albania
