Paguhet 750 € ora, njihuni me avokatin që do mbrojë Ramën në gjyq në Gjermani

Përmes një postimi në rrjetet sociale, kryeministri Edi Rama lajmëroi se ka nisur procedurën për gjyqin ndaj gazetarit Peter Tiede i gazetës gjermane ‘BILD’.

“Sapo i kam dhënë prokurën avokatit gjerman Matthias Prinz, për nisjen e procesit gjyqësor mbi publikimet e BILD! Gjykatat gjermane le ta vendosin kush ka të drejtë e kush ka faj në këtë mes. E bëj sepse shqiptarët meritojnë ta dinë të vërtetën nga drejtësia e atij vendi pa hije,” shkruante Rama pak më parë në tuiter.

Në fakt avokati Matthias Prinz në Gjermani është një nga avokatët më të famshëm. Prinz është shumë i njohur në Gjermani dhe më gjerë si avokat i suksesshëm në fushën e mbrojtjes së reputacionit, i specializuar për shkrimet e mediave. Ai paguhet mbi 750 euro në orë për një seancë gjyqësore.

Më herët Matthias Prinz ka përfaqësuar kompani e personazhe të njohur në Gjermani dhe botë. Prize ka edhe një lidhje të veçantë me gazetën BILD, pasi babai i tij ka qenë redaktor tek kjo gazetë. Në fakt edhe vetë Prinz ka punuar për gazetën Bild si korrespondent nga Hamburgu.