Muhamet Liko u nda nga jeta, Mirush Kabashi tregon amanetin e fundit të aktorit

Aktori i njohur Mirush Kabashi ka qenë sot i pranishëm në homazhet pranë Teatrit të Vlorës në nder të humoristit Muhamet Liko.

Kabashi ka rrëfyer për mediat se amaneti i fundit i Muhamet Likos ishte të transmetonte te brezat e rinj vlerat intelektuale që përcjell humori i qytetit të Vlorës me anë të ngritjeve të problematikave të ndryshme.

“Ata nuk bënë humor për hatër të humorit, kishin një humor të zi që na bënte t’i thërrisnin kokën, dhe bënin që të skuqeshin ata që na drejtojnë. Ata kanë ngritur vlerat intelektuale të Vlorës, amaneti i fundit i Metit para se të ikte në Itali ishte transmetimi i vlerave të tyre te artistët e rinj. Dhanë shembullin si artistët mund të jenë dhe njerëz të jashtëzakonshëm”, u shpreh Kabashi.

Aktori i njohur i humorit Muhamet Liko u nda nga jeta në moshën 65-vjeçare më 31 maj në Itali.

Shkak për ndarjen e parakohshme nga jeta u bë ataku kardiak, ndërkohë që trupi i tij i pajetë është sjellë sot në Shqipëri ku i janë bërë dhe homazhet përpara se të përcillej në banesën e fundit në qytetin e Vlorës.