Presidenti vendit, Ilir Meta ishte shumë i ashpër në fjalën e tij edhe ndaj qëndrimit të ndërkombëtarëve. Meta tha se ka folur me disa përfaqësues të ndërkombëtareve në vendin tonë, por nuk do të lejoj më që ata të përzihen në punët e brendshme të Shqipërisë.
Me të njëjtën gjuhë si Opozita, kreu i shtetit tha se zgjedhjet e 30 qershorit janë pa garë dhe se ndërkombëtarët as nuk duhet t’i monitorojnë ato por lë të shkojnë në Korenë e Veriut.
“Unë me zotin Lajcak kam folur edhe pak më parë, nëse ka ndonjë nga Brukseli që mund të nxjerrë ndonjë dekret për zgjedhjet le ta nxjerrë, për të gjithë duhet të jetë e qartë, presidenti jam unë, përgjegjësinë për stabilitetin e vendit e kam unë. Kush ka dëshirë të kontribuojë me ngatërresa, jemi lodhur me disa prej tyre deri tani, eurojuristë. Krizën do ta zgjidhim, nuk kanë mbaruar as shqiptarët e përgjegjëshëm dhe as europianët e përgjegjshëm” tha Meta. “Pluralizëm zgjedhje të lira dhe unitet. A ka ndonjë që beson se zgjedhjet e 30 qershorit do të ishin të lira dhe demokratike dhe shqiptarët do të shprehin vullnetin e tyre? Ju jeni të rinj, por ka një dallim mes zgjedhjeve dhe votimeve, shqiptarët kanë nevojë për zgjedhje jo votime, se ashtu kanë pasur 45 vite. Nëse ka ndonjë europian dhe amerikan që do të monitorojë zgjedhje të tilla, le të shkojë në Korenë e Veriut, këtu jo se ka ardhur pluralizimi politik. Zero janë mundësitë pa e zgjidhur këtë krizë, jo për të çelur negociatat tani, por as në shtator dhe shumë vite integrimi nuk do të duket në horizont”
