Merret vendimi, sheshi në bulevardin e ri të Tiranës do të quhet “Çamëria”

Bulevardi më i ri që po ndërtohet dhe hapet dalëngadalë në Tiranë, do të ketë një shesh kryesor që do të quhet “Çamëria”. Bulevardi që fillon nga busti i mbretit Zog dhe deri në lumin e Tiranës, i quajtur rëndom si ‘Bulevardi i ri i Tiranës’, një pjesë të rëndësishme të tij do ta ketë me këtë emër shumë domethënës të krahinës shqiptarë, e cila në shekullin e shkuar iu aneksua Greqisë.

Vendimi për sheshin kryesor të bulevardit u mor në mbledhjen e sotme të Këshillit Bashkiak të Tiranës. Këtë akt, kryetari i bashkisë, Erion Veliaj e kishte premtuar edhe më herët si një formë nderimi dhe respekti për komunitetin çam dhe në respekt të vuajtjeve dhe sakrificave të tyre.

“Ky ka qenë një premtim i joni dhe prandaj unë propozoj qe kjo nisme të futet ne rendin e ditës dhe kërkoj nga anëtarët e këshillit bashkiak që ta votojnë”, tha Veliaj.

Kështu, me këtë vendim, sheshi i tretë për nga rëndësia në kryeqytet, që është ende nën ndërtim do të ketë emrin e Çamërisë, si një formë nderimi për këtë komunitet dhe vjen në prag të përkujtimit të 75 vjetorit të gjenocidit grek mbi çamët.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern