Merkel bind Haradinajn, Kosova gati të pezullojë taksën me Serbinë

Ajo që ishte mohuar në samitin e Berlinit, duket se do të ndodhë pas një takimi kokë më kokë mes kryeministrit Ramush Haradinaj dhe kancelares gjermane, Angela Merkel. Pas një takimi mes dy liderëve,  Ramush Haradinaj, tha të premten në Prishtinë pas kthimit nga Berlini, se Kosova është e gatshme të shqyrtojë mundësinë e pezullimit të tarifave ndaj mallrave serbe. Po sipas tij kjo mund të bëhet vetëm për një kohë të caktuar dhe se për këtë duhet të ketë qartësi të procesit të bisedimeve.

Kryeministri, qëndroi për dy ditë në Gjermani ku pati takime me kancelaren gjermane, Angela Merkel dhe zyrtarë të tjerë në Berlin, me të cilët pas dyerve të mbyllura, ka diskutuar zhvillimet në Kosovë, mundësitë e ripërtëritjes së bisedimeve me Serbinë dhe përgatitjet për takimin e Parisit me 1 korrik, të organizuar nga kancelarja Merkel dhe presidenti francez, Emmanuel Macron.