Largimi i papritur i Skënder Gegës nga Partizani, del arsyeja kryesore që ndikoi

Skënder Gega është larguar nga drejtimi i skuadrës së Partizanit dhe ky lajm i ka befasuar të gjithë tifozët e futbollit.

Lajmi për largimin e trajnerit 55-vjeçar menjëherë pasi riktheu trofeun e kampionëve te skuadra e të kuqve ishte si një rrufe në qiell të hapur.

Si për çudi ky lajm rastisi dhe dje për festën e fëmijëve dhe në fillim u duk i pabesueshëm.

Motivi që u lakua dje më shumë në lidhje me largimin e Skënder Gegës ishin arsyet familjare, pasi familja e tij jeton në Shtetet e Bashkuara të Amerikës.

Trajneri Gega ka qëndruar prej më shumë se një viti larg familjes duke sakrifikuar kështu për karrierën e tij.

Në festën e titullit nga Amerika kishin udhëtuar për të qenë pranë gëzimit të trajnerit edhe bashkëshortja, fëmijët dhe nipi. Mësohet se familjarisht janë ulur dhe kanë biseduar pas festës dhe është vendosur ky vendim i vështirë për karrierën e trajnerit.