Kandidati i pavarur për Bashkinë e Lezhës Eduart Ndocaj ka bërë një kallëzim penal në prokurori pasi shprehet se e kanë kërcënuar.
Kallëzimi është bërë në Prokurorinë e Rrethit Gjyqësor Lezhë ku ish-deputeti kaubojs ka treguar se javën e fundit ka marrë kërcënime e telefonata natën dhe ditën që të tërhiqet nga gara për Bashkinë e Lezhës.
Sot në mesditë Ndocaj ka vënë në dispozicion të prokurorisë telefonin e tij celular ku pretendon që ka marrë telefonata dhe mesazhe kërcënuese.
“Kam gjeneralitetet e mësipërme dhe jam me banim në qytetin e Lezhës në adresën e mësipërme dhe kam ardhur në Komisariatin e Policisë Lezhë për të bërë në kallëzim penal në lidhje me kanosje që më kanë ardhur ditët e fundit në adresën time dhe shqetësime orë pas ore në telefon. Unë aktualisht jam kandidaturë për Kryetar i Bashkisë së Lezhës në zgjedhjet e datës 30 qershor, zgjedhje këto për pushtetin vendor. Jam në fushatë prej ditësh ashtu siç e përcakton dhe Kodi Zgjedhor kam bërë dhe takim të ndryshme me zgjedhës dhe banorë të zonave të ndryshme të Lezhës.
Në komunikimet e mia unë flas me telefonin tim celular dhe në këtë telefon kam vetëm një numër i cili është numri që dhashë dhe më sipër, pra numri im i kontaktit që është marrë në kompani celulare prej rreth 4 vitesh në emrin tim, pra është i regjistruar në emrin tim. Në këtë periudhë, pra ditët e fundit, në këtë numër kanë filluar të më sjellin disa telefonata kërcënuese ku më kërkohet të tërhiqem nga gara elektorale, të mos shpërndaj materiale zgjedhore ‘se përndryshe do ta shohësh se çfarë do të të bëjmë’.
Këtë numër e mbaj vetëm unë dhe se nuk e përdor askush tjetër. Duke qenë se jam kandidat për Kryetar Bashkie dua që të zhvilloj fushatën time elektorale dhe se dua që të mos më kërcënojnë dhe se nuk mund të duroj shqetësime të tilla dhe kërcënime ndaj meje. Numri që më kanë sjellë telefonatat kërcënuese është numri 06*******. Gjithashtu prej rreth një jave më kanë marrë orë pa orë me numra sekretë duke më shqetësuar pasi kanë qenë dhe orë të vona dhe orë të ndryshme të ditës”, deklaron Ndocaj në kallëzimin e tij.
