Jo vetëm sulme, Rama lavdëron 3 kryebashkiakët e PD që kanë punuar

Gjatë një takimi me banorët e Njësisë Administrative nr. 5 në Tiranë, kryeministri Edi Rama ka përmendur tre kryebashkiakët e Partisë Demokratike që sipas tij kanë punuar dhe duhet të ishin në garë në zgjedhjet vendore të 30 qershorit.

Shefi i qeverisë u shpreh se kryebashkiaku i Tropojës Besnik Dushaj, ai i Përmetit Niko Shupuli dhe kryetari i Bashkisë Devoll Bledjon Nallbati, duhet të merrnin pjesë në garën elektorale.

“Kush i nxori këta nga zgjedhjet, ne i nxorëm. Ai Besniku në Tropojë ka punuar. Pse e nxore nga gara jepi përgjigje? Atij të Devollit, jepi përgjigj, atij të Përmetit pse e nxore nga gara. Është e pa imagjinueshme nuk konceptohet dot, shko pra futu në garë. Ata po lënë pa punë edhe presidentin, edhe ai po i bie këmbës ta heqin nga puna”, tha Rama.

Më tej, kryeministri sulmoi dhe opozitën, teksa u shpreh se “PD po e bëjnë nga luan në një lepur vegjetarian”, ndërsa i renditi disa nga punët që duhet të bëjë sa më shpejt kandidati socialist për Tiranën, Erion Veliaj.

“Shiko, Kopsht Zoologjik, Teatrin e ri të Kukullave për fëmijë duhet t’i bësh. Piramida është duke u bërë”, theksoi kryeministri.