Gjykata e Krimeve të Rënda ka vendosur sot masën e sigurisë “Arrest me Burg” për të pandehurin Hasan Kanaçi, i cili është arrestuari i fundit për grabitjen spektakolare në pistën e aeroportit të Rinasit më 9 prill.
Kanaçi i cili është punonjës në aeroportin e Rinasit në pjesën e kargos ka qëndruar i heshtur në sallë në pritje të vendimit dhe nëpërmjet avokatit ka pretenduar se nuk ka asnjë lidhje me ngjarjen.
48-vjecari ra në prangat e policisë më 15 qershor dhe dyshohet se është informatori që ka treguar te pjesëtarët e bandës se kur mbërrinte blindi me para në pistën e aeroportit.
Ai konsiderohet si personi i fundit që i dërgon paratë në avion.
Gjatë kontrollit të ushtruar në banesën e të arrestuarit, policia sekuestroi një sasi të madhe valute dhe lekësh. Policia njofton se po vijon punën për kapjen e personave të tjerë të përfshirë në këtë ngjarje. Deri tani policia kishte arrestuar 6 persona për grabitjen e blindit me para në pistë, Kanaçi është i shtati.
