LIGJET E BIZNESIT
Drejtuesja e Prokurorisë së Krimeve të Rënda doli këtë të premte në një deklaratë për mediet, nga ku foli për dosjen e famshme tashmë 339. Por fill pas këtij komunikimi i prokurores, Prela, gazetarja Klodiana Lala i ka veçuar disa deklarata të saj, duke i cilësuar ato si të gabuara.
Donika Prela e konsideroi dosjen 339 si dosjen më të madhe që ka pasur prokuroria shqiptare në historinë e saj. Ndërsa gazetarja Lala tha se ajo gabohet, duke përmendur një tjetër rast. “Zonja Prela gaboi kur tha se kjo ishte dosja më e madhe e hetuar nga Krimet e Rënda. Si dosja më e madhe është konsideruar ajo e kërpit të Shkrelit, ku u mor gjithë fshati si i pandehur”, tha Lala.
Ndërsa sa i përket shqetësimit për nxjerrjen e sekretit hetimor, Lala tha se një gjë e tillë i takon Prokurorisë së Tiranës dhe jo asaj për Krime të Rënda. “Ajo tregoi se Krimet e Rënda kanë pamundësi për të transkriptuar përgjimet ambientale dhe telefonike, ndaj edhe nuk janë vënë para përgjegjësisë personat që kanë kryer vepër penale”, shtoi Lala.
