Detaje të reja nga përgjimet e publikuara nga tabloidi gjerman Bild në lidhje me “Dosjen 339/1″ kanë dalë në dritë. Janë gazetarët Trashgim Sokolaj dhe Poli Hoxha, të cilët kanë zbuluar se në përgjimet ku përmenden kryetari i Bashkisë së Durrësit, Vangjush Dako si dhe të tjerë zyrtarë të lartë të PS në këtë qark, ka edhe shumë të tjerë, emri i të cilëve është hequr.
Të ftuar në emisionin “Arena”, Sokolaj dhe Hoxha shprehen se nga zbardhjet e përgjimeve janë hequr shumë emra ish-ministrash dhe deputetësh të rëndësishëm të Partisë Socialiste.
“Në zbardhje janë fshirë shumë emra. Janë hequr shumë emra ministra e deputetësh që flisnin hapur me këta persona në fushatë,”– tha Poli Hoxha.
Më tej, Sokolaj shtoi se njëri nga ish-ministrat ka shkuar vetë të takojë një nga anëtarët e grupeve kriminale për t’i dhënë një qese me para.
“Janë dy ish-ministra. Njëri madje i thotë vet do vi të të sjell një qese me para,”- shton gazetari.
Hila: Është kapur ajo qese?
Sokolaj: Kjo është një gjë e keqe në fakt. Është shumë e keqe sepse po bëhet gjueti shtrigash ndaj prokurorëve. Vetë policia gjyqësore duhet të shkonte atje ku shkonte qesja. Nëse do ishte bërë kjo gjë do të ishin kapur personat përgjegjës.
