Fati i 30 qershorit, kush janë 5 anëtarët e Kolegjit Zgjedhor që do të marrin vendimin për zgjedhjet

Në Kolegjin Zgjedhor sapo ka nisur mbledhja ku do të diskutohet kërkesa e partisë së Idajet Beqirit, i cili kërkon të c’regjistrohet nga zgjedhjet vendore të 30 qershorit, pas anulimit të dekretit nga presidenti Ilir Meta.

Trupa gjykuese e këtij Kolegji që në rast se do të pranohet kërkesa i hap rrugë shtyrjes së zgjedhjeve përbëhet nga pesë anëtarë: Astrit Kalaja, Ridvan Hado, Tomor Skerli, Artur Malaj dhe Lindita Sinanaj.

Burime bëjnë me dije se qeveria do të pranojë cilindo vendim të Kolegjit Zgjedhor, qoftë edhe për shtyrjen e zgjedhjeve, pavarësisht se nga ana tjetër thuhet se vendimin e Metës mund ta marrë në shqyrtim vetëm Gjykata Kushtetuese.

Pala paditëse në Kolegjin Zgjedhor: Iu kemi paraqitur kërkesë që të çrregjistrohet partia “Uniteti Kombëtar” nga zgjedhjet e 30 qershorit. Jemi habitur me çdekretimin e zgjedhjeve, nuk pati asnjë konsultim. Kjo situatë ishte e papajtueshme për partinë tonë.

U vumë mes dy zjarreve, strukturat e partisë ishin në situatë absurde, dukej sikur po luftonim me mullinjtë erës. Në këtë situatë duhej të merrnim një vendim. Ishin dy vendime, ai i Presidentit, dhe ai i KQZ-së. Ne jemi përgatitur për zgjedhje, por asnjëherë nuk kemi marrë para.

Nuk duam të marrim pjesë në zgjedhje, emri i partisë sonë nuk duhet të figuroj në atë fletë votimi. Shkaku i vetëm që kërkojmë të mos jemi në zgjedhje, është vetëm vendimi i Presidentit. Nuk kishim zgjedhje tjetër, vetëm të vinim në Kolegjinë Zgjedhor. Vendimin e KQZ e kontrollon Kolegji Zgjedhor, prandaj erdhëm tek ju. Dikush duhet ta zgjidh këtë problem. Presidenti ka thënë që zgjedhjet janë moniste, por mes tyre në listë ka edhe parti të djathta.