Audio-përgjimet e gazetës gjermane, Bild nuk ndalen. Pas dy publikimeve të para këtë të enjte gazeta gjermane pritet të publikojë edhe 10 përgjime te reja.
Sipas disa burimeve të balkanweb, në këto përgjime të reja që do të bëhen publike nga BILD flitet sërish për skemën e organizuar nga Partia Socialiste për të siguruar fitoren në Dibrës. Bisedat zhvillohen mes zyrtarëve të lartë socialiste, drejtuesve të policisë dhe personave të identifikuar si të lidhur me krimin.
Në to flitet sërish për blerjen e votave. Por edhe për shantazhe dhe mbledhjen e kartave të identitetit për votues të njohur si mbështetës të opozitës duke pamundësuar votimin e tyre.
Ashtu siç paralajmëroi të hënën, gazetari Peter Tiede përgjimet e radhës pritet të jenë shumë të bujshme. Mësohet se në njërën nga bisedat e përgjuara, shfaqet shefi i komisariatit të Dibrës, Robert Aga duke iu krenuar ministrit Damian Gjiknuri, në atë kohë shef i shtabit elektoral për Dibrën, se ai bashkë me njerëzit e tij, ka aplikuar një strategji të tijën në mënyrë që PS të fitojë zgjedhjet.
