Deklarata e djeshme e kryetares së LSI se është e gatshme për të garuar përballë Ilir Metës për kreun e kësaj partie shkaktoi një bujë shumë të madhe.
“Po të dojë të kthehet, le të vije ta provojë në garë për kryetar të LSI-së dhe të shohim kush do ta fitojë.”- tha Kryemadhi dje gjatë protestës.
Edhe pse Presidenti Ilir Meta nuk ka kthyer një përgjigje të drejtpërdrejtë, ai sot i jep rëndësi dhe peshë rolit të gruas.
Në mjediset e hapura të Presidencës sot u zhvillua ekspozita kushtuar grave të suksesshme shqiptare kudo ku jetojnë: në Shqipëri, Kosovë, Maqedoni, Zvicër, Gjermani, Itali, Shtetet e Bashkuara të Amerikës, etj.
Pasi përuroi hapjen e ekspozitës së titulluar “121 jetë suksesi në 121 fotografi” dhe duke mirëpritur zonjat dhe zonjushat që me kontributet e tyre lartësojnë emrin e Shqipërisë në botë, Presidenti tha: “U gëzova pa masë kur mësova se ‘Albanian Excellence’ e ka shpallur vitin 2019 ‘Viti i Gruas’, sepse kemi vërtet nevojë për qetësinë, mençurinë dhe impenjimin e grave shqiptare në të gjitha aspektet e jetës dhe shoqërisë dhe e kemi të domosdoshme që të jetë vërtet një vit pozitiv.
Jam i bindur që, kur gratë janë të bashkuara dhe japin kontributin e tyre, përfituesit më të mëdhenj janë familja, komuniteti dhe atdheu. Është shumë e rëndësishme që të dëgjohet zëri i grave dhe vajzave për çështje më të rëndësishme që kanë të bëjnë me fuqizimin e tyre ekonomik, me fuqizimin e tyre politik, me mbështetjen sidomos për gratë kryefamiljare që kanë një përgjegjësi të jashtëzakonshme, me mbështetjen për gratë dhe vajzat në nevojë, apo përfaqësimi më i gjerë i grave e vajzave në vendimmarrje kudo.
Vetëm duke u mundësuar grave dhe vajzave të bëhen pjesë më aktive dhe më e rëndësishme në vendimmarrje do të kemi ligje më të mira për familjen, për fëmijët, për moshën e tretë dhe më gjerë.
Sa më i madh të jetë roli i gruas aq më e emancipuar, më e shëndetshme dhe më e bashkuar do të jetë shoqëria jonë.”- tha Meta, duke kthyer kështu në një farë mënyrë përgjigje për sfidën e hapur që lëshoi dje Monika Kryemadhi.
