Situata e tensionuar në shkollën “3 Dëshmorët” në Kavajë ka zgjatur për gati dy orë, ku është duke kundërshtuar vendosjen e materialeve në KZAZ nr.42 për zgjedhjet e 30 qershorit.
Mbështetësit e Opozitës së bashkuar janë përplasur në distancë për minuta të tëra me forcat e policisë që kishin marrë në ruajtje ambientet ku ndodhet KZAZ. Nuk kanë munguar tensionet dhe përplasjet fizike në disa momente.
Nga ana tjetër Efektivët e policisë kanë reaguar me gaz lotsjellës duke i larguar protestuesit që në momentin e parë që tentuan për të rrëzuar me forcë derën e shkollës për të nxjerrë prej aty materialet e Komisionit Zonal për Administrimin e Zgjedhjeve.
Rreth orës 21:40 ata kanë hequr dorë nga tentativa për të hyrë në ambientet e KZAZ dhe u larguan drejt selisë së Bashkisë së Kavajës.
Drejtuesit lokal, mëngjesin e së mërkurës, kishin lënë orën 20:00 si afat për të hequr materialet e KZAZ nr. 42 gjë e cila nuk ndodhi.
