Basha tregon dy pikat e panegociueshme për daljen nga kriza

Kryetari i Partisë Demokratike, Lulzim Basha është duke folur në këto momente për më shumë se 40 minuta pra protestuesve në bulevardin “Dëshmorët e Kombit”.

Basha edhe në këtë fjalim ka shprehur vendosmërinë për t’i qëndruar kushteve që Opozita ka kërkuar për të dalë nga kriza.

Basha ka treguar edhe dy pikat më të forta që nuk negociohen. Lideri i Opozitës tha se largimi i Ramës dhe lirimi i të gjithë atyre që janë ndalur në protesta janë dy pikat që nuk do të ndryshohen deri në fund.

“Ky oqean shprese, ky bashkim i jashtëzakonshëm është frika më e madhe e Ramës, është shpresa besimi i çdo shqiptari të ndershëm te ndryshimi që po vjen: E duam Shqipërinë si gjithë Europa. Për Shqipërinë si gjithë Europa ka nisur kjo betejë e sot, nga ky shesh në emrin e gjithsecilit prej jush, e të rinjve e të rejave, të vogëlushëve tanë, të fëmijëve tanë, dua të zotohem para Kombit dhe para Europës e perëndimit se kjo betejë nuk do mbarojë me largimin e Ramës po vetëm kur të vendosim kushte për Shqipërinë si gjithë Europa.

Gjatë kësaj jave e asaj që shkoi çdo kush çdo përfaqësues i demokracive perëndimore që nuk ka besuar krimin e organizuar bandën në pushtet më në fund e ka kuptuar se përballë tyre ka qenë një krye mafioz, atyre u them se standardi europian kalon në dy kushte:

Largimi i Ramës është i panegociueshëm. Dhe zgjidhje politike pa nxjerrë nga qelitë ata që protestuan për liri e demokraci e pa futur në qeli ata që vodhën votat nuk ka zgjidhje politike. Ua kemi borxh gjithsecilit prej jush, që këtë krizë të thellë mos ta mbyllim me një marrëveshje politike, bazuar mbi pazare politike, kjo krizë duhet e do të mbyllet jo mbi pazare por mbi parime e sot dua ta them qartë se parimi i parë është çuarja para drejtësisë e burgut atyre që i vodhën votën shqiptarëve. Ta dijë mirë Edi Rama, ne nuk bëjmë asnjë hap pas, nuk ka zgjedhje me 30 qershor. Aleanca qytetare është në këmbë.” – u shpreh Basha.