Basha mbledh aleatët dhe kryesinë në ‘selinë blu’, ja kur merret vendimi për protestën e 9-të

Kryetari i Partisë Demokratike, Lulzim Basha ka mbledhur pasditen e sotme aleatët e tij. Në fokus të mbledhjes në ‘selinë blu’ ka qenë ecuria e aksionit opozitar në ditët në vijim. Ky ka qenë takimi i parë me qëllim përcaktimin e ditës për protestën e radhës kombëtare të Opozitës në Tiranë.

Pas takimit me aleatët, Basha është futur në një tjetër takim me anëtarët e Kryesisë së Partisë. Pas këtyre dy mbledhjeve do të vendoset për datën e protestës së 9-të kombëtare.

Sakaq në përfundim të mbledhjes mes aleatëve dhe Bashës, kreu i PR, Fatmir Mediu është shprehur se partitë opozitare nuk kanë ndryshuar qëndrim, ku kërkohet zgjedhje të lira dhe të ndershme, pa Ramën kryeministër.

“U diskutua angazhimi i opozitës për të garantuar zgjedhje të lira dhe të ndershme. Pa dyshim që qytetarët do të qëndrojnë deri në fund për të garantuar zgjedhje të lira dhe të ndershme, pa Ramën kryeministër”, tha Mediu.