Sekretari i përgjithshëm i Partisë Socialiste, Taulant Balla ka vazhduar të ironizojë me kryetarin e PD, edhe nga qyteti i Elbasanit.
Në një takim me të rinjtë e këtij qyteti, Taulant Balla tha se Basha është ngelësi më i keq që ka pasur ndonjëherë Shqipëria në histori.
Sipas Ballës nuk do të ketë asnjë tërheqje nga data 30 qershor për të zhvilluar zgjedhjet e ardhshme lokale.
“Nëse ne do të bënim, qoftë edhe një hap të vetëm pas, për t’u tërhequr nga 30 Qershori, ne pikë së pari, do të kishim tradhtuar Shqipërinë, Reformën në Drejtësi, do të kishim tradhtuar edhe paktin për universitetin. Ne nuk tërhiqemi në 30 Qershor, në nuk tërhiqemi nga pakti për universitetin. Ne nuk tërhiqemi nga pakti, që një student, ose studente ekselente duhet të ketë një të ardhme shumë herë më të mirë. Luli është ngelësi më i keq që mund të ketë njohur ndonjëherë Shqipëria. Nuk ka në rekordin e vet politik, qoftë edhe një 5, të gjitha 4. Dhe tani thotë; “më jepni kredite, dua ca kredite shtesë”. Por nëse i ke 4 të gjitha, a mund të marrësh kreditë shtesë?
Prandaj nuk shtyhet 30 Qershori. 30 Qershori është një moment i rëndësishëm për shtetin demokratik, për respektimin e institucioneve. Këto ditë ka ndodhur akti më i rëndë i gjithë këtyre viteve që nga ’97. Kurrë më parë, një parti politike apo një grupim njerëzish, nuk kishin sulmuar shkollat. Kurrë më parë”, – deklaroi Balla nga Elbasani.
