Arratisje spektakolare, 34-vjeçari shqiptar del nga burgu në Itali

Të hënën një shtetas shqiptar është arratisur nga burgu i Trapanit në Siçili, ku vuante dënimin për trafik droge. Bëhet me dije se i dënuari Lekë Luca, 34 vjeç, është arratisur duke kapërcyer murin rrethues të burgut ‘San Giuliano’.

Sipas medieve italiane arratisja ka ndodhur rreth orës 15, kur përfundon orari ajrimit, kur ka qenë pikërisht momenti kur gardianët kanë shkuar për të udhëhequr të burgosurit në qeli, por kanë konstatuar se Luca mungonte.

Menjëherë është dhënë alarmi dhe patrulla të shumta karabinierësh dhe policie janë vënë në lëvizje për të gjetur 34-vjeçarin, që dyshohet se është pritur nga dikush me makinë jashtë mureve të burgut. Kjo është hera e dytë që Luca arratiset nga burgu.