A paralajmëroi Meta shtyrjen e zgjedhjeve nga Gjermania?

Në këto javë të fundit politika shqiptare po bëhet gjithmonë dhe më e ngurtë. Mazhoranca nuk po lëshon pe nga bindja për të realizuar zgjedhjet më 30 qershor, ndërsa opozita nuk po heq dorë nga kërkesa për largimin e Edi Ramës dhe ngritjen e një qeverie tranzitore që do ta çojë vendin në zgjedhje të parakohshme.

Presidenti Ilir Meta në këtë mes, duket shumë i distancuar edhe pse në disa raste ai ka provuar të marrë rolin e protagonistit, siç ishte në rastin më të fundit, ku ai bëri thirrje që të ndërhyjë duke shtyrë datën e zgjedhjeve.

Ilir Meta nuk e përjashtoi as nga Gjermania mundësinë e shtyrjes së zgjedhjeve, por përmes një mesazhi të Kancelares Angela Merkel, një citat, që mund të interpretohet si një mesazh i koduar, që Presidenti e shpërndau përmes rrjeteve sociale.

“Siç u kujtoi Kancelarja Angela Merkel njohësve të mirë të historisë: “Çdo gjë, dhe nëse duket e gdhendur në gur dhe e pandryshueshme, në të vërtetë mund të ndryshojë”, shkruan ai.

A ka marrë Meta garanci për qetësimin e situatës politike përmes shtyrjes së zgjedhjeve? Në bazë të disa informacioneve që disponon Fast News Albania dita e hënë do të jetë vendimtare, ku do të merret një hap kyç për gjendjen politike në vend.