Teksa 30 qershori afron dhe palët politike shqiptare vijojnë të jenë fort të pozicionuara në polet e tyre, teoritë për daljen nga kjo krizë janë gjithmonë dhe më të larmishme. Por përtej këtyre ka edhe teori që mund të konsiderohen konspirative edhe pse politika shqiptare shpesh herë ka provuar se konspiracioni është më pranë të vërtetës së sa racionaliteti.
Një pyetje që vjen në mendjen e shqiptarëve që ndjekin politikën në kohët e fundit është: A janë Erion Veliaj dhe Lulzim Basha në një llogore të fshehtë për të rrëzuar Ramën nga karrigia kryeministrore?
Pohimi do të kërkonte një guxim të madh, por edhe refuzimi në vetvete do të ishte po ashtu shumë i guximshëm, duke marrë parasysh disa fakte dhe shenja të kohëve të fundit.
Lulzim Basha së pari nga foltorja e Partisë Demokratike nuk ka lënë gjë të zezë dhe baltë pa hedhur mbi figurat më të rëndësishme të Partisë Socialiste. Rama, i pari dhe pas tij, Tahiri, Xhafa, Gjiknuri, Ahmetaj, Ruci, Balla, Dako, Sejdini dhe së fundmi Sandër Lleshaj, të gjithë kanë dalë të paktën një herë në shënjestrën e Bashës, duke i akuzuar, ose edhe thjesht duke i sulmuar me deklarata. Për Veliajn jo se nuk ka pasur akuza, por ato kanë ardhur në momente te qeta, që shumë herë janë dukur sikur Basha i ka nxjerrë nga goja e tij sa për të thënë. Një shembull i freskët ishte spoti i Partisë Demokratike që ftonte qytetarët për të marrë pjesë në protestën kombëtare të 21 qershorit. Sërish të gjitha figurat e larta të PS-së dhe disa kriminelë që akuzohen se kanë lidhje me këtë mazhorancë ishin të përfshira dhe Veliaj kishte shpëtuar sërish.
Ndoshta pa dashje, apo një lapsus teknik edhe pse e vështirë të besohet se mund të harrohet pa u futur në shënjestër njeriu që nga të gjithë shikohet si pasardhësi i Ramës në krye të PS-së.
Por sinjale të një aleance nën rrogoz nuk ka dhënë vetëm Basha. Veliaj nga ana tjetër gjithmonë e ka akuzuar Bashën për performancën e dobët që ka bërë në katër vite si kryebashkiak i Tiranës, por në momente të caktuara i ka dhënë edhe ai shenjat “e dashurisë”. Mesazhi në tuiter mbrëmjen e së premtes menjëherë pas mbylljes së protestës ishte një ironi e ndërthurur me përgëzim për këtë lloj tubimi, ishte më i frekëti.
Për të mos u harruar në këtë pikë është edhe një akuzë e vjetër që rëndon mbi të dy se janë dy figura që sponsorizohen nga shoqata ndërkombëtare me agjendë disa vjeçare në vendin tonë. Nëse Rama është në ditët e tij të fundit, si Basha edhe Veliaj e dinë shumë mirë se janë dy figurat që mund të uleshin më shpejt në karrigen e lakmuar kryeministrore. Fundja stazhin si kryetar të Bashkisë Tiranë tashmë e kanë kaluar dhe tashmë mund të futen në zyrën e ish-komitetit qendror të Partisë./Fast News Albania
