LIGJET E BIZNESIT
Një denoncim i fortë vjen nga Aleanca për Mbrojtjen e Teatrit, e cila në një postim në faqen zyrtare shkruan se prej disa ditësh në godinën e Teatrit Kombëtar një trupë teatrale me fëmijë po kryen prova rregullisht për një shfaqje.
Kujtojmë se Ministria e Kulturës ka vendosur ta mbyllë Teatrin Kombëtar me arsyen se godina rrezikon të shëmbet dhe nuk është e sigurtë për shikuesit që do të vinë për shfaqjet.
Por mesa duket fëmijët bëjnë përjashtim dhe qeveria i konsideron “të mbrojtur” nga rreziku i shembjes.
Ende nuk dihet kush është organizatori e kush ka dhënë urdhër që fëmijët të kryejnë prova në godinën e Teatrit Kombëtar.
POSTIMI ZYRTAR I ALEANCES PER MBROJTJEN E TEATRIT
Gënjeshtrat e Qeverisë nuk kanë të sosur!
Prej disa ditësh, një trupë teatrale me fëmijë po kryen prova rregullisht në godinën e Teatrit Kombëtar.
Nuk është e qartë se me lejen e kujt ndodh ky veprim, kush i shoqëron fëmijët, dhe për çfarë qëllimi ndodhin këto prova, por ky veprim ka disa ditë që ndodh.
Ju rikujtojmë se para një viti, Ministria e Kulturës e mbylli Teatrin Kombëtar me justifikimin se godina ishte e degraduar dhe rrezikonte shembejn. Me sa duket, një vit më pas, pa asnjë investim, godina qenka e sigurtë deri sa lejohet të kryejnë fëmijët prova në të.
