Sulmoi policinë me bomba Molotov, gjykata jep vendimin për protestuesin

Gjykata e Tiranës ka vendosur masën “arrest me burg” për protestuesin Marash Qerimin, i cili qëlloi me bomba molotov policinë.

40-vjeçari nga Tropoja, u arrestua pasi në protestën e opozitës joparlamentare më 11 maj, u zbulua nga filmimet se ka sulmuar institucionet dhe punonjësit e policisë me bomba molotov, kapsolla, flakadanë dhe sende të forta.

Qerimi akuzohet për veprat penale: “organizimi dhe pjesëmarrja në grumbullime e manifestime te paligjshme”, “kundërshtimi i punonjësit të Policisë së rendit publik”, “goditja për shkak të detyrës”, “shkatërrimi i pronës me zjarr” dhe “shkelja e rregullave mbi lëndët plasëse, djegëse dhe radioaktive”.

Më 11 maj, opozita zhvilloi një protestë marshim për rreth tre orë në 5 institucionet kryesore të vendit, pasi sipas tyre ato janë të kapura nga krimi. Ajo u pasua nga protesta e 13 majit, e cila ishte reagim i dhunës së ushtruar ndaj Sekretarit Organizativ të Partisë Demokratike Said Dollapi.