Si euro po humbet vlerën?! Humbësit dhe përfituesit

Ka frenuar rënien, por zyrtarisht nuk mund të quhet më monedha e fortë. Euro është shkëmbyer në fund të kësaj jave me 122.9 lekë, sipas kursit të Bankës së Shqipërisë.

Një nivel i ulët që ruhet tashmë prej dy javësh. Ekspertët e tregut të këmbimit ia faturojnë dobësimin e monedhës europiane ngadalësimit të ekonomisë, të shkaktuar edhe nga kriza politike dhe pasiguria e përgjithshme.

Kërkesa në treg nga importuesit dhe tregtarët është e ulët, ndërkohë që oferta mbetet e lartë. Kjo për shkak jo vetëm të faktorëve të përhershëm si remitancat, por edhe fillimit të prurjeve nga turizmi, me çeljen e sezonit.

Ndërkohë që kanalet informalë mbeten si gjeneruesit kryesorë të sasinë së madhe të euros në qarkullim, edhe pse impakti i tyre nuk mund të matet me saktësi.

Këtu bëhet fjalë jo vetëm për eurot nga aktivitetet e paligjshme, si kultivimi dhe tregtimi i kanabisit, por edhe asaj që njihet si ekonomia gri dhe ku përfshihen paratë e evazionit fiskal, korrupsionit etj.

Nga kjo situatë me euro të dobët përfitojnë të gjithë ata që kanë kredi në këtë monedhë, pasi do të paguajnë më pak për këstrt mujorë. Përfitojnë importuesit dhe tregtarët që do të paguajnë më pak për mallrat dhe produktet, si dhe qeveria, që do ta shlyejë më lirë borxhin e jashtëm.

Të humburit janë ato mijëra familje që jetojnë me të ardhurat e emigrantëve, ata që marrin pagën në euro, si dhe eksportuesit, norma e fitimit të së cilëve do të bjerë.