Rama nuk ndalet, mesazhe politike edhe në natën e shenjtë për myslimanët

Kryeministri Rama e ka treguar disa herë ndër vite se nuk ka njohur limite në sjellje apo veprime të tij. Edhe një herë tjetër kreu i qeverisë shqiptare ka nxjerr në pah këtë pjesë të karakterit të tij.

Gjatë një darke iftari të shtruar me krerë të besimeve fetare në vend, kryeministri nuk nguroi që të përcillte edhe mesazhe politike, që në disa momente mund të konsiderohen edhe denigruese.

Ashtu siç e ka bërë traditë tashmë, Rama ka marrë pjesë nga Kurani dhe citate nga dijetarë të besimit islam, për të çuar ujë në mullirin e tij.

“Kurani i shenjtë është një udhërrëfyes shumë bujar dhe ndihmon këdo që i drejtohet, besimtar, ose jo besimtar. I thotë, mos hidh në rrugë hapa pafytyrësie. Dheun nuk e çan dot më dysh dhe as malit majën dot nuk ia prek. Sado që të përplasësh këmbët mbi dhe nuk e ke në dorë në zemër t’i futesh dhe aq ë pak mbi të t’i lësh gjurmë tjetrit.

Ç’janë këto orvatje këto mundime, këto gjeste pa kuptim? Nëse duhet të ecim përpara dhe të bëni përpara luftoni për kauzën tuaj, por bëjeni atë në shtegun e Zotit dhe sipas udhërrëfyesit të tij. Kurani nuk i përjashton kundërshtarët, i nënkupton si pjesë e jetës por thotë luftoni, luftoni kundërshtarët, por pa dalë nga shtegu i Zotit. Mos u bëni faqezinj dhe bukëshkalë, se Zoti nuk i do bukëshkalët. Lufto pra vetë në shtegun, fundja përgjegjës je vetëm për vetveten dhe sjelljen tënde dhe shtegu i Zotit për ata që s’besojnë është ai i arsyes.

Zoti ndihmon këdo që në shtegun e arsyes kërkon ndihmë dhe i ndriçon arsyen kujtdo që atij i drejtohet pa i diktuar se çfarë duhet të besojë dhe kë duhet të besojë. E në fund fare, dua t’ju falënderoj të gjithëve për praninë tuaj në këtë sofër tradicionale tanimë për ne. Ne jemi këtu të rrethuar nga mure që rrezatojnë histori pushtetesh dhe që na mësojnë nëse kemi vesh t’i dëgjojmë që pushtetet ndërrohen, por shtegu i arsyes mbetet dhe kush prej tij devijon, humb pushtetin mbi vetveten.”- tha Rama ndër të tjera në fjalën e tij para se të fillonte darka e Iftarit.

Edhe në këtë rast duket se Rama e ka angazhuar ‘ushtrinë’ e këshilltarëve të tij që të shkëpusin fraza korrekte nga Kurani apo thënie dijetarësh që të mbronin linjën e fjalimit të tij për të sulmuar kundërshtarin në Opozitë.