Pasi u shoqërua mesditën e sotme për shkak të protestës në zonën e Unazës së Re, për ish-deputetin Klevis Balliu është prerë edhe fleta e arrestit.
Mësohet se Balliu është mbajtur në qeli dhe shumë shpejt pritet të dalë para gjykatës për të mësuar masën e arrestit. Klevis Balliu ishte në ballin e protestës gjatë ditës së sotme në zonën e “Astirit”, duke bllokuar kalimin e eskortës së kryeministrit Rama.
Gjatë protestës pati disa momente të degjenerimit në dhunë, ku u gjuajt me gurë dhe mjete të forta. Të lënduar pati nga të dyja palët, si protestuesit ashtu edhe efektivët e forcave speciale.
“Gjatë tubimit të paligjshëm zhvilluar sot në mesditë në aksin kryesor rrugor në zonën e Unazës së Re, një grup protestuesish kanë goditur me sende të forta duke plagosur 4 punonjës policie, 3 nga forcat “Shqiponja” dhe 1 nga FNSH. Efektivët e Policisë po marrin ndihmë mjekësore në Spitalin e Traumës në Tiranë dhe janë jashtë rrezikut për jetën.”- bën me dije Policia përmes një njoftimi të shpërndarë për mediet.
Klevis Balliu në momentin e ndalimit mesditën e sotme është parë të dalë nga dritarja e makinës së policisë, duke bërë shenjën e dy gishtave.
