Opozita sot sërish në protestë, ja çfarë paralajmëroi Lulzim Basha një ditë më parë

Opozita e bashkuar do të zhvillojë sërish një protestë ditën e sotme.

Pavarësisht motit, opozita njofton se sot pasdite në orën 18.30 do të ketë një protest tjetër si ajo e së shtunës, në bulevardin “Dëshmorët e Kombit”.

Dje mbrëmë kryetari i PD Lulzim Basha publikoi një spot ku thuhej se tani shpresa është ndezur dhe qeveria e krimit nuk e ndal dot.

“Asnjë hap pas! #13 maj #18.30 #ShqipëriaSiEuropa” shkroi Basha në postimin e tij.

Ndërkohë në fjalën e mbajtur dje gjatë protestës së organizuar para Drejtorisë së Policisë Tiranë, Basha ka paralajmëruar se dhunës së ushtruar nga policia ndaj protestuesve, e sidomos ndaj Sekretarit Organizativ të PD, Sait Dollapi do ti përgjigjet sot në mënyrë proporcionale nga populli.

“E gjithë shqipëria e bashkuar kundër një grushti horrash që përmes një grushti shteti kanë instaluar juntën në vend. Junta i ka orët e numëruara, Maduro i Ballkanit i ka orët e numëruara. Skenari i dhunës që vuri dje në lëvizje kriminelë veshur e uniforme me kriminelë të tjerë të infiltruar në turmën e protestuesve paqësorë, skenari i shërbeu Ramës vetëm për të treguar para botës se i vetmi i interesuar për dhunë është kreu i Juntës.

Dhuna barbare ndaj protestuesve, figurave politike apo Sait Dollapit, ishte mesazh junte, e mafia për të trëmbur shqiptarët por do të marrë nesër përgjigje proporcionale nga populli. Askush i arrestuar nuk do të qëndrojë në kthetrat e atyre që marrin urdhra politike”, ka thënë Basha.