Nuk futen në zgjedhje, por nga ana tjetër LSI dhe PD shpalosin programet elektorale

Opozita ditën e dielë ka protestën e radhës kombëtare. Në qëndrimet e liderëve opozitar përsëritet gjatë gjithë kohës se në 30 qershor zgjedhje pa Opozitën nuk mund të ketë.

Të dyja partitë kryesore opozitare, PD dhe LSI e kanë shprehur disa herë se nuk do të futen në zgjedhjet lokale të 30 qershorit pa u larguar kryeministri. Por duket se nga kjo retorike e LSI dhe PD ka diçka që stonon në lidhje me veprimet e këtyre dy partive.

PD nga njëra anë ka nisur të shpërndajë në takimet e Bashës fletëpalosjet e planit të saj emergjent për të nxjerrë vendin nga kriza ku ndodhet. LSI gjithashtu ka nisur një sërë takimesh për të prezantuar programet e saj për fusha të ndryshme të jetës së vendit.

Së fundmi LSI ka mbledhur një tryezë diskutimi për programin e tyre në Bujqësi. Në këtë takim pjesëmarrës ishin zv.kryetari i LSI, Luan Rama, nënkryetari Petrit Vasili, disa prej ish-deputetëve si dhe ekspertet italiane të frutikultures Dr.Francesco Tagliani dhe Dr. Luca Gambarotto.

Edhe kreu i opozitës, Lulzim Basha në takimet e zhvilluara deri më tani nuk ka lënë pa përmendur programet elektorale të PD-së ku sipas tij do të zbatohen sapo të vijnë në pushtet.