Nis punën Komisioni i Reformës Zgjedhore, Hajdari tregon sa kushton një mandat deputeti

Këtë të martë, sipas programit të Kuvendit është mbledhur për herë të parë Komisioni i Posaçëm për Reformën Zgjedhore.

Nën drejtimin e dy bashkëkryetarëve, Damian Gjiknuri dhe Rudina Hajdari, Komisioni është plotësuar me deputetë të Mazhorancës dhe të dhe “opozitës e re”. Të pranishëm në këtë mbledhje të parë kanë qenë edhe ambasadorët në Shqipëri, përfshirë të Ngarkuarën me Punë të Ambasadës Amerikane, Leyla Moses-Ones.

Në fjalën e tij, bashkëkryetari Damian Gjiknuri ka vijuar të mbajë të hapur derën për pjesën e Opozitës që ka dalë nga Parlamenti, PD dhe LSI. Gjiknuri tha se shpreson që edhe përfaqësuesit e PD dhe LSI t’i bashkohen kolegëve të tyre në çdo kohë që ata e mendojnë të arsyeshme.

“Do të vazhdojmë pavarësisht mungesës së vullnetet, kanë një karrige bosh në çdo kohë që duan të marrin pjesë. Kjo është një ftesë e hapur, edhe pse kanë zgjedhur një rrugë jo demokratike. Jam i bindur që një ditë do të ndodhë, pavarësisht nga retorika e çastit”, tha Gjiknuri.

Ndërsa bashkëkryetarja tjetër e komisionit Rudina Hajdari, në fjalën e saj është fokusuar te konsensusi politik. Sipas Hajdarit, vendi ka nevojë urgjente për një sistem të ri politik, me politikanë që vijnë në parlament nëpërmjet votës së qytetarëve dhe jo nga blerja e mandatit. Më tej në fjalën e saj kryetarja e “grupit parlamentar demokrat” ka treguar se sa kushton sot të bërit deputet me sistemin aktual që ne kemi.

“Ndryshimi i sistemit politik, është i dominuar nga antikushtetutshmëria. Klasa politike nuk është e përfaqësuar vërtetësish nga njerëzit, shqiptarët janë të interesuar për këtë reformë. kjo reformë kërkon një vullnet të gjerë politik. Kemi para në dekada që komisionet nuk kanë krijuar reforma të mirë. Duke marrë parasysh sfidën e madhe, mendoj që fakti që jemi ulur këtu sot tregon që ka një konsensus të gjerë për të bërë ndryshim të sistemit aktual. Zgjedhjet e 2013,2015,2017 kanë qenë problematike dhe janë zgjidhje që janë përdorur nga partitë e mëdha si industri e riciklimit të pushtetit të tyre dhe kjo është munduar edhe nga sistemi politik. Kemi arritur në një pikë kur një mandat kushton 1 mln euro. Sot nuk mund të futesh në parlament pa pasur fonde, kemi një treg të zi të shitblerjes së votës. Ne jemi të vetëdijshëm që duket të arrijmë një konsensus politik që të gjithë shqiptarët të përfaqësohen në parlament dhe që pjesë e tij të jenë njerëz më të mirë”, tha Hajdari.