Koalicioni Opozitar me në krye Partinë Demokratike, prej më shumë se një vit, tashmë ka në gjirin e tij edhe dy parti që para zgjedhjeve të 2017-ës ishin pjesë e qeverisë bashkë me PS. PDIU dhe LSI pasi mbetën jashtë “tepsisë së qeverisë” iu bashkuan Lulzim Bashës dhe PD në Opozitë.
Këto dy parti dhe kryetarët e tyre, Monika Kryemadhi e Shpëtim Idrizi që sot janë në krahë të Bashës, dikur ishin objektivi kryesor i sulmeve të tij. Kthehemi pas në një intervistë të Lulzim Bashës dhënë për gazetaren Rudina Xhunga në Vizion Plus, pasi kryetari i PD kishte firmosur marrëveshjen e famshme të 17 majit me Ramën.
Basha adreson në drejtim të LSI dhe PDIU akuza nga më të ashprat. Madje disa prej tyre edhe për Ramën nuk i ka artikuluar. Duke folur me gazetaren Xhunga, Basha shprehet shumë i sigurt që LSI nuk do të vijë në pushtet. Në fakt për këtë gjë kreu demokrat nuk gaboi në parashikim, por duket se ajo që i doli jashtë planit të tij, është se edhe ai vetë vijon të jetë në Opozitë, por me një ndryshim se tashmë “i bën shoqëri” edhe LSI.
Por nuk është vetëm ribashkimi me LSI, ajo që bën habi te sjellja politike e Bashës. Për çudi kreu i PD ia ka dalë që të fusë “nën një ombrellë” një çam dhe një grek (PDIU dhe PBDNJ). Siç asnjëherë nuk kishte ndodhur në këto 3 dekada pluralizëm politik në Shqipëri, një parti që përfaqëson minoritetin etnik grek, është në të njëjtin koalicion me një parti që thotë se përfaqëson komunitetin çam në Shqipëri.
