Konventa e LSI, Kryemadhi: Të shembet sa më parë ky regjim

Lëvizja Socialiste për Integrim ka mbajtur sot Konventën Kombëtare ku është prezantuar dhe programi për daljen nga kriza të vendit.

Gjatë fjalimit të saj kryetarja e partisë Monika Kryemadhi tha se shqiptarët nuk i gënjen dot as Rama dhe as klonet e tij lokale dhe se ky regjim duhet të shembet sa më parë që brezat e ardhshëm të kenë mundësi të mësojnë dhe punojnë.

“Shqiptarët tashmë nuk i gënjen dot as Rama dhe as klonet e tij lokale nëpër Shqipëri. Nuk i gënjejmë dot as unë dhe as bashkudhëtari im i opozitës. Kanë krijuar alergji për politikën, kjo vjen se rezultat i mosbesimit që njerëzit e thjeshtë kanë akumuluar.

Ne mund të fitojmë buzëqeshjen e shqiptarëve vetëm duke nënshkruar një kontratë të sinqertë dhe të ndershme me ta. Ne duhet të ngremë një sistem që do të presë çdo dorë që kërkon të vjedhë. Tashmë duhet me ligje, me nene, e zeza mbi të bardhë sepse shqiptarët janë lodhur me premtime.

Beteja jonë është shembja e këtij sistemi të kalbur, që brezat e ardhshëm të kenë mundësi të mësojnë dhe të punojnë. Sa më parë të shembet ky regjim aq më shumë shanse do të kenë shqiptarët për rritje rrogash dhe integrim Europian. Me këtë Kryeministër ne humbëm mundësinë për hapjen e negociatave, madje mund të na rikthejë edhe vizat.

Ftoj të gjithë ata socialistë të tradhtuar, të luftojmë së bashku për ta bërë Shqipërinë shtëpinë e shqiptarëve”, tha Kryemadhi.