Kandidati për kryetar bashkie shokon sërish: Do hap shtëpi publike, do legalizoj hashashin

Edhe në këtë fushatë për zgjedhjet lokale të 30 qershorit nuk mungojnë kandidatët e çuditshëm. Njëri prej tyre kandidon për Bashkinë e Këlcyrës. Hazbi Kasaj me siglën e partisë, Emigracioni Shqiptar kërkon të marrë drejtimin e bashkisë së vogël në jug të vendit.

Në prononcimet e tij të deritanishme, Kasaj i ka habitur të gjithë. Në fillim ai mallkoi të gjithë ata që nuk do e votonin, ndërsa tashmë bën dy premtime te bujshme. Legalizimi i hashashit dhe hapja e një shtëpie publike në qytetin e Këlcyrës duket të jenë dy kartat e forta që Hazbi Kasaj do të përdorë në këtë fushatë elektorale.

“Tani s’ke ça bën. Po fute teknologjinë dhe shkencën, njerëzit pasurohen. Nëse unë do të bëhem kryebashkiak dhe do të më votojnë njerëzit në Këlcyrë, të jeni të bindur dhe rinia e Tepelenës, Gjirokastër dhe Përmetit do të banojnë këtu.

Ata do të ikin vetëm për qef, pse të iki ai nëpër botë? Me mua kryebashkiak, qefi do të jetë i shumëllojshëm, siç e do rinia. Ata do kenë bollëkun do kenë paranë.

Slogani im është “Puno pak, ha shumë dhe bëj qejf “, pak Punë dhe shumë qejf.

Dikush do shtëpinë publike, dikush do argëtimin, dikush boksin. Unë do t’i programoj të gjitha këto, do hap shtëpi publike dhe do legalizoj hashashin. Lë ta furnizojë Shqipëria të gjithë botën me hashash,”– tha Kasaj.

Më tej kandidati për Bashkinë e Këlcyrës tha se i pëlqente strategjia që ndjek kryeministri Edi Rama dhe jo ajo e Bashës.

“Rama është strateg është gjigant, jo Basha. Basha është druvar që nxjerr popullin rrugëve dhe i sorollat kot,”- ka thënë Kasaj.