Anëtarja e Kryesisë së Partisë Demokratike, Grida Duma, tha se rekomandimi i Komisionit Evropian për çeljen e negociatave nuk duhet pritur me optimizëm të madh, pasi është hera e gjashtë që vjen një rekomandim i tillë, e gjithçka varet nga Këshilli i Ministrave të vendeve të BE, ku pritshmëria nuk është edhe aq pozitive.
“Nuk mund të ketë pozitivitet për një gjë që pritej. Është hera e gjashtë që kemi rekomandim nga KE, por kur vjen vendimi i Këshillit shohin qëndrimin real ndaj Shqipërisë. Shqipëria po bëhet edhe problem për Maqedoninë e Veriut në rrugëtimin drejt BE”, u shpreh Duma.
Si pengesë për çeljen e negociatave ajo sheh edhe reformën në drejtësi, e cila sipas Dumës, në progres-raport u vlerësua vetëm si nismë, por jo si reformë e implementuar apo e zbatuar tërësisht në sistemin e drejtësisë.
“Nëse për disa fusha thuhet që ka progres, Reforma në Drejtësi është vlerësuar si reformë e nisur, por jo si reformë e implementuar apo e aplikuar. Nuk është çështje e ligjeve në letër, por e aplikimit në realitet. Kjo thuhet edhe në progres-raport. Çdo progres-raport është se pozitiv. Por si në rastin e reformës në drejtësi, edhe në procesin e integrimit kemi progres të moderuar dhe jo progres të mirë”, u shpreh Duma.
Duke folur për angazhimet e Partisë Demokratike, Duma tha se një pjesë e grupeve të punës dalin në terren në tre orare të ndryshme në takime me qytetarët, kryesisht me bizneset, duke u paraqitur atyre arsyet dhe alternativën, se ata kanë një tjetër zgjidhje për Shqipërinë.
“Një pjesë e grupeve të punës së Partisë Demokratike dalin në terren në tre orare të ndryshme në takime me qytetarët, kryesisht me bizneset, duke u paraqitur atyre arsyet dhe alternativën që PD ka një tjetër zgjidhje për Shqipërinë”, u shpreh ajo, duke sqaruar se është qartësimi i qytetarëve, se “Patjetër që duhet të ketë rregulla loje dhe zgjidhje të votës së lirë, por kjo duhet të vijë në përfundim për një Shqipëri më të mirë. Paralelisht po ndjekim dy rrugët. Kërkojmë rregulla loje, por edh alternativë për një Shqipëri më të mirë. Nuk ka të bëjë me zgjedhjet lokale, por me ofertën e opozitës për alternativën e saj”, u shpreh ajo.
Më tej, Duma tregoi edhe disa prej pikave të ofertës së PD.
“Aktualisht në këto dy ditë jemi përqendruar në programin ekonomik, që fillon nga taksa e sheshtë, pulla fiskale që do të thotë përjashtimi i biznesit të vogël nga taksimi direkt dhe indirekt. Zhdukjen taksës progresive, zhdukjen e taksimit të dyfishtë për shtresën e mesme. Janë 11 pika të tilla që prekin bizneset. Kjo betejë është për të rimëkëmbur vendin, jo thjesht një betejë që lidhet me zgjedhjet”, tha Grida Duma në “Top Talk” në Top Channel.
