Flet Sait Dollapi: Doja të shkoja në spital, më mbanin në burg

Pas plagosjes në protestën e Opozitës, Sait Dollapi ka folur për herë të parë në emisionin “Të PaEkspozuarit” në News24. Dollapi ka treguar se në momentin e arrestimit ai ka kërkuar që ta ccojnë në spital për të marrë ndihmën e parë, por është mbajtur në qeli.

“Në momentin e parë që jam ndaluar i kam kërkuar policisë të më çojë policisë të më dërgojë në spital për të marrë ndihmën e parë. Rreth dy orë e gjysmë kam mbetur në drejtorinë e Tiranës me pretekstin se nuk kalo dot ambulanca”, u shpreh Dollapi.

Sekretari Organizativ i PD-së sqaroi se që në momentin e parë të ndalimit ka kërkuar transportin e tij në spital por kjo kërkesë është refuzuar.

“Unë sot nuk kam asnjë urdhër ndalimi, asnjë procesverbal ku kam shkelur ligjin. Spitali Ushtarak të duket si kur ishe në Kabul aq shumë polici kishte. Tre mjete kam pasur, një kundragaz, një kapele dhe një celular. Celularin e ka marrë policia”, u shpreh zyrtari i selisë blu.

Sa i përket një sekuence të publikuar, ku shfaqet Sait Dollapi para kryeministrisë dhe që është argumentuar si akt dhune ndaj policisë, ky i fundit është shprehur:

“Unë jam sekretar organizativ i PD-së, jo oficer që bën plane lufte. Te kryeministria kam pasur një shishe uji në dorë, që mund ta verifikojë çdo oficer policie. Nëse del një polic, nga të gjitha protestat e opozitës, e thotë që Dollapi ka ushtruar dhunë, unë dorëzohem që nesër”.