E zyrtarizon Rama, ja kur i prezanton PS kandidatët për kryetarë bashkie në të gjithë vendin

Do të jetë dita e shtunë, kur Partia Socialiste pritet të zyrtarizojë të gjithë emrat që do të kandidojnë për 61 bashkitë në vend. Lajmin e bëri të ditur kryeministri Rama pas daljes nga mbledhja e kryesisë së Partisë Socialiste.

Duke folur para gazetarëve, Rama tha se për kryetarët do të dilet me një vendim ditën e shtunë, ndërsa për këshillat bashkiak procesi mund të marrë pak më shumë kohë.

“Kemi bërë një diskutim paraprak për t’i paraprirë vendimmarrjes së ditës së shtunë ku do të konsolidojmë të gjithë listën e kandidatëve për kryetarë të bashkive si dhe për këshillat bashkiakë. Për kryetarët e bashkive do vendosim emër për emër ditën e shtunë, për këshillat bashkiak do konsolidojmë të gjitha kriteret dhe pastaj do të mandatojmë të deleguarit sipas qarqeve që t depozitojnë sipas afatit listën e kandidatëve për këshillat e bashkive për zgjedhjet e 30 qershorit. Në 30 qershor ne do të kërkojmë votën e qytetarëve në të 61 bashkitë e vendit për të marrë një mandat për 4 vitet e ardhshme në drejtimin e 61 bashkive”,- u shpreh Rama.