Çfarë pritet të ndodhë sot, Basha mbledh kryesinë dhe aleatët në seli

Në selinë e Partisë Demokratike ka filluar takimi midis aleatëve të kryetarit të PD Lulzim Basha si dhe me anëtarët e kryesisë.

Ashtu siç paralajmëroi një ditë më parë, sot do të diskutohet për vijimin e aksionit opozitar që do të jetë më protesta të mëdha.

Dje gjatë konferencës me gazetaret, kreu demokrat tha se sot do takohet me “forumet më të larta të Partisë Demokratike dhe ka therritur një konsultë të gjithë koalicionit të bashkuar të opozitës për agjendën e aksionit politik”.

Basha tha se do të vazhdojnë sërish me protestat, ndërsa u shpreh se protestuesit “nuk i ndali as shiu, e jo më Edi Rama që nuk i ndal”.

“Zgjidhja politike është vetëm një, kryeministri i krimit duhet të largohet, një qeveri tranzitore, një dialog gjithëpartiak dhe transparent, për të stabilizuar gjendjen e rëndë të rendit edhe kushtetues dhe për t’i hapur rrugë një dialogu më të gjerë për t’i kthyer shqiptarëve lirinë për të votuar.

Ne do të vazhdojmë aksionin tonë ku do të ndërthuren protestat më të mëdha që ka parë ndonjëherë Shqipëria me ofertën për qeveri tranzitore. Zgjedhje të diktuara nga krimit, zgjedhje false, zgjedhje të marra peng nga krimi i organizuar nuk do të ketë më në Shqipëri. Ky është një mesazh i qartë që sot kumbon nga çdo cep i Shqipërisë.

Nesër kam thirrur forumet më të larta të Partisë Demokratike dhe një konsultë të gjithë koalicionit të bashkuar të opozitës për agjendën e aksionit politik. Ky është momenti për të intensifikuar dhe vazhduar me vendosmëri betejën tonë. Nesër do t’ju informojmë mbi agjendën politike të opozitës”, tha Basha.