Bujar Leskaj rikthehet në krye të KLSH

Bujar Leskaj është rikthyer të marrë drejtimin e Kontrollit të Lartë të Shtetit.

Kryetari i KLSH që prej vitit 2007, Leskaj mësohet se do të vazhdojë të jetë në krye të këtij  institucioni deri në momentin kur do të zëvendësohet nga një drejtues i ri.

Në një njoftim të firmosur nga ai, thuhet se zv.kryetarja e KLSH-së, Lindita Lati Milo, është tërhequr nga ushtrimi i kompetencave të kryetarit për arsye personale.

“Pas kërkesës për tërheqje nga kompetencat e deleguara të zv. Kryetares, znj. Lindita Milo për arsye personale, dt. 21.05.2019, nr. 347, dhe garantimit te vijueshmërisë normale të punës;

Në kushtet e zgjatjes në kohë të nominimit dhe përzgjedhjes së Kryetarit të ri të KLSH-së, sipas përcaktimeve të Ligjit 154/2014. VENDOSA: 1. Shfuqizimin e kompetencave të deleguara me vendimin e Kryetarit nr. 244, datë 12.12.2018 zv/Kryetarit të KLSH-së znj. Lindita Lati (Milo). 2. Ky vendim do i përcillet Presidentit të Republikës, Kryetarit të Kuvendit, Kryetarit të opozitës. Vendimi hyn në fuqi pas botimit në fletoren zyrtare.”- thuhet në vendimin e kreut të KLSH.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Kujtojmë se Bujar Leskajt i përfundoi mandati në janar të këtij viti dhe kompetencat i kaluan zëvendëses së tij Lindita Lati Milos, e cila tashmë është tërhequr. Presidenti Ilir Meta ka propozuar për të marrë drejtimin e KLSH Vitore Tushën dhe Bahri Shaqirin, por të dyja kandidaturat janë rrëzuar nga mazhoranca me pretendimet se u mungonte eksperienca në fushën financiare.