Në emisonin”360 Gradë” në Ora News, ish-presidenti dhe ish-kryeministri, Sali Berisha është ndalur edhe në një temë shumë delikate që lidhet me çështjen e Kosovës. Në vitin 1992, kur ishte president i vendit, Berisha tha se kishte pasur disa propozime për copëtimin e Kosovës. Sipas Berishës ishin disa, të dërguarit nga Milosheviçi që vinin në Tiranë me harta në duar, duke propozuar copëtimin e Kosovës si zgjidhje për konfliktin atje.
“Në vitin 1999 një ideolog i nacionalizmit serb vazhdoi të boshtëzojë dhe kosovizojë edhe më tej doktrinën e nacionalizmit serb me Kosovën. Kështu që para lufte pasi u hap Shqipëria në ’92, serbët me shpejtësi përpiluan projektin për ndarjen e Kosovës. Një njeri ishte i gjithëfuqishëm në Serbi dhe ky ishte Millosheviç. Ky kishte pikëpamjen se çështja nuk zgjidhet me Rugovën, por me Berishën në Shqipëri. Ndaj vinin tek unë me harta, të dërguarit me të gjitha anët. Vinin sepse Millosheviç thoshte se kjo zgjidhet me Shqipërinë.”
Sipas Sali Berishës kishte pasur një ide për të krijuar në Kosovë një mini-shtet dhe pjesët e tjera të ndaheshin mes Shqipërisë dhe Serbisë. Por ish-kryeministri tha se ai në atë kohë kishte komunikuar me presidentin e SHBA-ve për këtë gjendje.
“Ata pasi ta copëtonin Kosovën siç donin, pasi të merrnin veriun e Ibrit dhe një pjesë të Prishtinës, pasi të merrnin një San Marino, një Sandora, një Litenshtejn. Pasi të krijonin këto atëherë Shqipëria të merrte ato të tjerat. Nëse shkon tek biseda ime me Xhorxh Bush në ’92 i kam thënë: President ata duan ta copëtojnë, ta ndajnë Kosovën, ta pastrojnë pjesën që do marrin nga shqiptarët, t’i nxjerrin në kufi me ne. Unë i kam thënë, unë kufijtë do t’i hap.”
